Saturday, May 31, 2014

PESAN RAMBAU HARI GAWAI ARI BARU BIAN



1 JUNE 2014

NGETANKA PEMANAH KAUL PUPU RABAN BANSA ENGGAU JALAI PENGARAP TI MERUAN RAMBAU PENGERAMI HARI GAWAI

Ninting bulan Enam (June), kitai sama berami nyambut gawai udah bekau kitai tembu ngetau enggau chara meri terima kasih ke utai ulih kitai ngagai Petara, Iya ti udah meri kitai berekat ngemudahka pengawa bumai kitai ke taun tu. Dulu menya kitai nyambut pengerami tu enggau chara nyambut bala raban petara dalam tiap pupu raban bansa kitai tiap kali udah badu pengawa ngetau.

Dalam reti jaku kemaya hari tu, baka ni chara kitai nyambut sereta ngintu pengerami tu lalu ke bala kitai ti enda bumai betupi agi, baka ni kitai nyambut gawai kitai tu? Ulih tauka enda gawai diintu kitai ngena asil kitai ti bekereja sepemanjai taun ke udah, tauka bagi kitai dalam ekonomi menua tu? Mayuh bendar bala orang ti napi chabar dalam pengawa sida ti ngidupka diri lalu mayuh agi mega sida nya ti tau disemaka kitai kair pagi empa pagi, kair lemai empa lemai.

Kitai kala dipadahka pasal penyampau tubuh bala orang ti seranta nyau majak nambah direjista di Sarawak ba taun tu, taja pan Gabenor baru kitai nya seruran belunjakka jaku iya ti madahka, ba pengujung taun tu ila penyampau per kapita kitai deka angkat lalu nya tau ngasuh menua kitai kaya agi ari selama tu. Enti bala orang ti endang lama udah kaya raja nya ditejuka majak nyadi kaya, ulih tauka enda per kapita kitai tu nambah, tang nama reti kitai mansar diri ngulihka nama menua ti tau dikumbai kaya enti bida pengaya nya majak besai lalu bala orang ti lama udah seranta nya diberi mimit bendar peluang ngelepaska diri empu ari penyuntuk enggau penyeranta. Kitai patut nekanka pengawa bebagika peluang ngulihka penatai pemisi kelimpah ari kitai ti deka meda pemanah lumur ba statistik ba per kapita.

Kelimpah ari regu dalam ekonomi, kitai benung meratika chabar-chabar ngagai pemanah kaul dalam pupu raban bansa enggau pemereti ati ba jalai pengarap ti udah diasaika kitai ngelama bepuluh-puluh taun tu. Dalam chura politik kitai, mayuh agi tuai politik ari menua kitai tu nadai ngembuan pemerani mansutka penemu mutarka pekara ti nanggul sereta ti dipeda tau ngachau penyerakup kitai ari pupu raban bansa di menua tu.

Pekara ti kala didinga tauka dipeda kitai ti udah mai regu nya baka pengawa orang ti ngelanggar rumah Dewan Undangan Negeri di Pulau Pinang enggau seminar ti ngelaban Kristian ba UiTM nya sekeda ari beberapa siri utai ti udah nyadi ti tau ngasuh kitai irau ati di Sarawak ti berasai besak deka mekuh penusah nya ari ti ngelekai ngagai menua kitai adap kitu. Kitai mega bisi dipadahka pasal pekara ti nyadi di Balai Ringin ti endur sekeda orang ari seraban NGO nguji ngemasukka bala nembiak sekula ngagai pengarap Islam. Nambahka nya mega kes pechara suratberita Herald mega baru deka belabuh ngeruga kitai, taja pan bala tuai politik baka sida Richard Riot enggau Joseph Kurup madahka kitai pekara nya mit lalu enda ulih ngeruga pengidup enggau pengelantang kitai.

Pengirau ati aku diatu nya ba sebengkah kes pechara dalam kot ti endur siku akim udah ngerembaika kes Herald nya ngagai gerija SIB. Kes tu udah kena balut penemu politik ti enda meruan, ti endur bala tuai politik irau agi ke pejalai politik sida ari sida ti patut ngintu pengelikun enggau kuasa pengelantang raban bansa ti betubuh mimit.

Di menua kitai tu empu, kitai rayat Sarawak udah dipadahka pasal Kepala Menteri kitai ti dulu suba, nama iya ti balat dibalut tuduh enggau pengamah penyalah makai suap enggau iya ti udah bisi rekod kamah ba opis MACC dikena ngelaban iya, diatu udah diberi tanda pangkat ari Agong.

Mayuh jaku tanya beduduk ari mayuh pansik ti dipejalaika opis MACC lalu nanya nama kebuah tanda pangkat nya lama bendar dipelalaika nyentuk ke maya meri iya enggau atur ti dipeda baka ti enda mukai-mukai. Sekali ke atur pengawa nya dikena nyeliahka bantah orang mayuh ngelaban siku tuai politik ti chukup kaya raja berindik ba rega nyawa bala rayat di menua tu empu?

Mayuh orang diatu berasai rawan ati; menua Malaysia tu enda agi likun endur ngidupka diri, nadai agi pemaik entara pupu raban bansa baka dulu menya, ti endur kitai tau ngidupka bala anak kitai nyentuk ke maya sida tau bulih bagi ti sebaka dalam pengidup sida dudi ari lalu mega dijaga perintah ti megai menua diatu. Bala anak telesak raban orang ti datai ngagai menua tu kelia ti udah bebendar bekereja di menua tu lalu mantu ngemansangka menua nyau dikumbai ‘orang datai’ lalu diatu sida nya udah disembur ngena jaku jai ti ngasuh sida pulai ngagai menua asal aki ini sida. Mayuh bala kitai diatu berundingka baka ni pemidik enggau pengelansik pengidup raban anak uchi sida tu. Pengerami Gawai kitai tentu deka mai besai agi reti  enti kitai bisi raban tuai ti enda takut tauka nangi ngemetulka sebarang utai ti salah sereta bingkuk ti majak dikereja sekeda bala orang ti lunggar penemu, awakka tau meri kitai pengarap ke sida ti tuai. Ba maya Gawai tu, aku minta semua orang Sarawak sama seati lalu mega minta bala tuai kitai meranika ati diri mutarka penanggul ti nuntung raban bansa kitai ngena sada nyawa ti siti sereta tunggal.

Taja pan genteran jaku aku ti dulu tadi munyi ti enda regas, tang aku keran bendar deka meda semua pupu raban bansa di menua Sarawak tu agi deka mengkang ngasaika pemanah kaul enggau penyerakup enggau pangan diri, semua orang bebasaka chara enggau daya idup enggau jalai pengarap pangan diri. Kaul kitai patut nyadi makin tegap. Aku baru udah pulai ari Gawai Burung di pelilih menua Suai, ti endur bala orang di menua nya nirika gawai dikena sida beterima kasih ke pemenang sida ba kes bechara ngambi pulai kuasa sida ba tanah pesaka sida ti udah kena keruga orang bukai. Baka orang bansa asal ti bukai dini-dini endur di sebelah dunya tu, kitai tinggi bendar perening ba kaul kitai enggau tanah, sungai enggau tasik ti diuan kitai sereta mega enggau pengeraja asal ti dalam iya. Aku ingatka jaku ari siku orang bebansa asal menua Alaska, Antionette Helmer ti nyebut “Tanah ti dikembuan kitai tu mih pengeraja kitai. Tu mih sebengkah pengeraja ti tau diturunka kitai ngagai anak telesak kitai ke guna sida dudi hari ila … tang enti nadai tanah, kitai deka nyadi orang ti seranta.”

Nya alai, lebuh maya kitai begawai ke tanda kitai meri terima kasih ke asil utai ti ditanam kitai, aram kitai sama-sama majak ngetanka kuasa kitai ba tanah kitai empu, tauka kuasa kitai ba jalai pengarap kitai, lalu idup manah begulai orang orang bukai. Aram mih kitai angkat lalu bejaku ngarika bala menyadi enggau kaban belayan kitai ti begunaka sukung kitai, laban kitai di menua Sarawak endang tebilang ngembuan penyerakup ti manah. Ba Pastor Martin Niemöller ti kala idup rambau perintah Nazi Jerman ti jai kelia, nyebut:

“Terubah iya sida datai ngiga bala komunis, lalu aku enda bejaku – laban aku ukai ari raban komunis; Udah nya sida datai ngiga bala sosialis, lalu aku mega enda bejaku – laban aku ukai sosialis; Udah nya sida datai ngiga bala kaban gerempung orang dagang, lalu aku enda bejaku – laban aku ukai kaban gerempung orang dagang; Udah nya sida datai ngiga orang bansa Judah, lalu aku enda bejaku – laban aku ukai bebansa Judah; Udah nya sida datai ngiga akui – lalu nadai orang bejaku ngari ke aku.”
Aku arapka semua pangan ari raban bansa Dayak aku selamat sereta nyambut berekat ari Allah Taala ba maya Gawai tu.

“Gayu-guru, Gerai nyamai”

Baru Bian
ADUN N70 Ba’ Kelalan

No comments: